Séra Heimir Steinsson

SÉRA Heimir Steinsson, þjóðgarðsvörður á Þingvöllum og fyrrverandi útvarpsstjóri, lést er hann var á 63. aldursári. Sr. Heimir Steinsson fæddist á Seyðisfirði 1. júlí 1937.

 

Sr. Heimir Steinsson fæddist á Seyðisfirði 1. júlí 1937. Foreldrar hans voru Steinn Jósúa Stefánsson skólastjóri og Arnþrúður Ingólfsdóttir húsfreyja. Hann lauk stúdentsprófi vorið 1957 og stundaði á árunum 1958-59 nám í fornleifafræði við Kaupmannahafnarháskóla og íslenskum fræðum við Háskóla Íslands 1959-61. Sr. Heimir lauk guðfræðiprófi frá Háskólanum vorið 1966 og stundaði framhaldsnám í trúfræði og almennri kirkjusögu við háskólann í Edinborg veturinn 1968-69. Þá sótti hann námskeið í norskum, dönskum og sænskum lýðháskólum árin 1969-72 og kenndi jafnframt við lýðháskóla í Noregi og Danmörku.

Sr. Heimir stundaði ýmis störf meðfram námi og rak m.a. forskóla fyrir börn í Laugarneshverfi árin 1961-65. Hann var sóknarprestur í Seyðisfjarðarprestakalli árin 1966-68 og var jafnframt stundakennari við Barna- og unglingaskólann þar. Hann var rektor Lýðháskólans í Skálholti, síðar Skálholtsskóla, frá stofnun haustið 1972 til ársins 1982. Þá var hann sóknarprestur í Þingvallaprestakalli og jafnframt þjóðgarðsvörður og gegndi hann því embætti til ársins 1991. Hann var skipaður útvarpsstjóri í október árið 1991 og gegndi því embætti þar til í desember 1996 en þá var hann skipaður í embætti sóknarprests og staðarhaldara á Þingvöllum.

Séra Heimi voru falin margháttuð félags- og trúnaðarstörf bæði á sviði kirkju- og fræðslumála. Þá stundaði hann ritstörf, gaf út ljóðabók og hugvekjur og hafði nýlega lokið við samningu annáls Prestafélags Íslands sem gefinn verður út í nýju guðfræðingatali.

Eftirlifandi kona sr. Heimis er Dóra Erla Þórhallsdóttir og eignuðust þau tvö börn, Þórhall, sóknarprest í Hafnarfjarðarkirkju, og Arnþrúði, grunnskólakennara, og bónda að Langhúsum, Fljótum.